Qeydiyyatdan keçdikdən sonra hesabıma daxil olarkən “Məlumat bazada tapılmadı” yazılır. Nə etməliyəm?
Hesabınıza daxil olarkən məlumatların düzgünlüyünü yoxlayın. Əgər yenə problem yaranarsa, “Daxil ol” bölməsindən “Şifrəmi unutmuşam” hissəsinə daxil olub, şifrənizi yeniləyin.
Əvvəlki illərdə Grants.edu.az saytında qeydiyyatdan keçmişəm, yeni müsabiqə üçün qeydiyyatdan keçməyə ehtiyac varmı?
Əvvəlki illərdə qeydiyyatdan keçmiş və şəxsi kabineti mövcud olan şəxslərin yenidən qeydiyyatdan keçməyinə ehtiyac yoxdur.
Əvvəlki elektron poçt ünvanımı artıq işlətmirəm və şifrəmi unutmuşam. Bu zaman nə etməliyəm?
Həm elektron poçt ünvanınızın, həm də şəxsi kabinetinizin şifrəsini unutduğunuz halda grants@edu.gov.az ünvanına müraciət edə bilərsiniz
Əvvəlki layihə nümunələrinə necə baxa bilərəm?
Grants.edu.az saytının Müsabiqələr bölməsində əvvəlki müsabiqələr haqqında məlumat, o cümlədən onların yekunlarına dair Hesabat jurnalının linki yerləşdirilmişdir. Əvvəlki layihələrlə həmin jurnallar vasitəsilə tanış olmaq mümkündür.
Dəstək məktubu olmasa olarmı?
Dəstək məktubunun olması vacib deyil, lakin müsabiqəyə təqdim olunmuş layihə qalib olduğu təqdirdə məktəb rəhbərliyinin əvvəlcədən məlumatlı olması layihənin həyata keçirilməsi və davamlılığı üçün vacibdir. Lakin iki məktəb birgə əməkdaşlıq çərçivəsində layihə verirsə, o zaman əməkdaşlığa dair razılaşma sənədi olmalıdır.
Qrant layihəsi çərçivəsində layihə rəhbəri üçün ödəniş nəzərdə tutula bilərmi?
Layihə rəhbəri resipiyentdirsə (qrant müqaviləsinin bağlandığı şəxs) Qrant haqqında qanuna əsasən, onun qrant layihəsi çərçivəsində fəaliyyəti ödənişli əsaslarla həyata keçirilə bilməz. Əgər resipiyent layihə çərçivəsində təlimçi və ya ekspert qismində iştirak edirsə, bu ictimai əsaslarla həyata keçirilməlidir.
Direktor müavini olaraq məktəb adından layihə üçün qeydiyyatdan keçə bilərikmi?
Ümumi təhsil müəssisəsi adından qrant layihəsinin təqdim olunması həmin müəssisənin rəhbəri (direktoru) tərəfindən həyata keçirilməlidir. Təhsil müəssisəsinin direktoru olmadıqda, onu əvəz edən şəxs qrant layihəsini təqdim edə bilər. Lakin direktor təyin olunduğu andan təhsil müəssisəsini qrant layihəsi üzrə təmsil edən şəxs direktor olacaqdır.
Məktəblər layihəni təqdim edəndə, hansısa bir QHT ilə əməkdaşlıq edə bilərmi?
Ümumi təhsil müəssisəsi QHT-lər ilə əməkdaşlıq qura bilər, lakin layihəni təqdim edərkən layihə təklif formasında bu məlumatı qeyd etməsi mütləqdir.
Analıq məzuniyyətində olan şəxs müsabiqəyə layihə təqdim edə bilərmi?
Şəxs analıq məzuniyyətinin 126 təqvim günü müsabiqədə iştirak edə bilməz (doğuşa qədər 70 təqvim günü, doğuşdan sonra 56 təqvim günü), çünki həmin vaxt şəxs əmək qabiliyyətini itirmiş hesab olunur, daha sonrakı dövrdə isə uşağa qulluğa görə məzuniyyətdədirsə müraciət edə bilər.
Təhsil sektorunda qismən çalışanlar da lahiyə təqdim edə bilərmi? Dövlət və özəl məktəblərdə işləməyən müəllim ixtisaslı şəxslər iştirak edə bilərmi?
Qrant müsabiqəsi üzrə «Tələblər»in 2.4-cü yarımbəndinə əsasən Fərdi layihələr kateqoriyası üzrə müsabiqədə iştirak üçün mülkiyyət formasından asılı olmayaraq, bütün ümumi təhsil müəssisələrində işləyən bütün pedaqoji işçilər müraciət edə bilərlər. Pedaqoji işçilər dedikdə müəllimlər, məsləhətçilər, tərbiyəçilər, müəllim köməkçiləri, çağırışaqədərki hazırlıq rəhbərləri, defektoloqlar, loqopedlər, praktik psixoloqlar, sosioloq-pedaqoqlar, uşaq birliyi rəhbərləri, laborantlar, kitabxanaçılar, sosial xidmət sahəsinin işçiləri, təhsil müəssisəsinin dərnək və musiqi rəhbərləri, metodistlər, təhsil müəssisəsində çalışan konsertmeysterlər və məşqçilər, ümumi təhsil müəssisələrində pedaqoji və idarəetmə fəaliyyəti ilə məşğul olan digər şəxslər nəzərdə tutulur. Müəllim ixtisaslı olan, lakin ümumi təhsil müəssisəndə fəaliyyət göstərməyən şəxslərin müsabiqədə iştirakına yol verilmir.
Layihə təklif formasının yazılması zamanı həcm məhdudiyyəti varmı?
Layihə təklif forması sayt üzərindən doldurulur və həcm məhdudiyyəti həmin bölmələrdə qeyd olunmuşdur.
Layihədə ekspert yoxdursa, rəyi kim verir?
Layihə çərçivəsində həyata keçirilən fəaliyyətlərin və ya yaradılacaq məhsulların, göstəriləcək xidmətlərin keyfiyyətinin ekspertizası nəzərdə tutulubsa, məhz layihədə nəzərdə tutulan şəkildə icra olunmalıdır. Bununla bağlı, donorun bağlanmış qrant müqaviləsində konkret tələbi yoxdur.
Qrant müsabiqəsi ancaq müəllimlərə aiddir? Məktəbdə çalışan psixoloqlar, kargüzarlar da pedoqoji cəhətdən yanaşmaqla, öz ideyalarını göndərə bilərlərmi?
Qrant müsabiqəsi üzrə «Tələblər»in 2.4-cü yarımbəndinə əsasən Fərdi layihələr kateqoriyası üzrə müsabiqədə iştirak üçün mülkiyyət formasından asılı olmayaraq, bütün ümumi təhsil müəssisələrində işləyən bütün pedaqoji işçilər müraciət edə bilərlər. Pedaqoji işçilər dedikdə, müəllimlər, müəllim köməkçiləri, çağırışaqədərki hazırlıq rəhbərləri, defektoloqlar, loqopedlər, praktik psixoloqlar, sosioloq-pedaqoqlar, uşaq birliyi rəhbərləri, laborantlar, kitabxanaçılar, təhsil müəssisələrinin və orqanlarının təlim-tərbiyə işi ilə məşğul olan rəhbərləri nəzərdə tutulur.
Əgər ümumi orta məktəb layihə ilə müraciət etmək istəyirsə, o zaman tam orta məktəblə bir yerdə etməlidir. Bəs belə olan halda layihə hansı məktəbin adı ilə getməlidir?
Qrant layihəsi tam orta məktəb adından təqdim olunmalıdır.
Layihədə həll kimi istifadə olunan alət ölkənin bütün məktəbləri üçün də istifadə oluna bilərsə, layihəni məhz layihə təklif edən məktəb üçün yox, ölkənin bütün məktəbləri üçün təqdim olunması mümkündürmü?
Layihə təklifi bütün ölkə üçün əhəmiyyətli məsələni hədəfləsə belə, layihə həmin məsələnin həllini əvvəlcə məktəbdə həyata keçirməli, uğurunu sübut etməlidir. Yalnız bundan sonra həmin layihənin ideyası digər məktəblərdə və yaxud milli səviyyədə tirajlana bilər.
Layihə yazarkən öz işlədiyim sahə üzrə layihə yazmağım mütləqdirmi? Məsələn, əgər mən ibtidai sinif müəllimi işləyirəmsə, mütləq şəkildə ibtidai sinifləri əhatə edən layihə olmalıdır?
Layihənin müəllifinin tərtib etmək istədiyi layihənin mövzusu sahəsində səriştə və təcrübəsi varsa, bu məsələlərə dair qrant layihəsi təqdim edə bilər.
Müraciət üçün uyğun kateqoriyanı seçin
Fərdi Layihələr
Müraciət et
Ümumtəhsil müəssisələri
Müraciət et
Qeydiyyat üçün uyğun kateqoriyanı seçin
Fərdi Layihələr
Qeydiyyatdan keç
Ümumtəhsil müəssisələri
Qeydiyyatdan keç